الخلافات بين الزوجين و كيفية التعامل معها

ازيكو عاملين ايه ؟😀
النهاردة موضوعنا خطير و مهم جدا
طبعا كلنا عارفين ان الحياة الزوجية لا بد من حدوث اختلافات فيها و ممكن خناقات وعلشان كده النهارده حابة اقولكو شوية نصايح كده  هتساعدكو ان انتو تتخطو الخلافات دي باقل الخساير لا وكمان هتطلعوا منها فاهمين بعض اكتر
الخلافات بين الزوجين شئ طبيعي جدا و له ايجابيات علي فكرة وهي ان بكل خلاف بيحصل بين الزوجين هما بيفهمو بعض اكتر و بالتالي كل ما يحصل خلاف هيفهمو بعض لحد ما يوصلو لمرحلة ان هما خلاص فهمو كل حاجة عن بعض و بالتالي الخلافات هتقل
بصي بقي يا ستي وانت كمان يا سيدي
▪اول واهم حاجة انت وهي لو حتي انطبقت السما علي الارض اوعي انت او هي تسيبو اوضتكو وتنامو في اوضة تانية مهما بلغ حجم الخلاف بينكو .......صدقوني انتي لو سيبتي اوضتك او انت سيبت اوضتك انتو كده بتوسعو الفجوة اللي حاصلة بينكو و طبعا احنا مش عايزين كده انما لو نمتو في اوضتكو هتلاقو نفسكو اتصالحتو من غير بقي ما كل واحد يعد يخطط هيقول ايه للتاني و هيعتزرلو ازاي و كده واوعي بقي تسمعي كلام مامتك او صاخبتك او جدتك مهما يكن في انها تقولك لا اتقلي عليه و سيبيه علشان ميزعلكيش تاني اوعي تسمعي لحد انتي اللي هتندمي بعد كده
▪وانتو لسه متخانقين بقي اوعي تجري تمسكي التيليفون وتكلمي مامتك او باباكي و تعدي تعيطي و تحكي اللي حصل  هقولك ليه ...انتي و جوزك هتتصالحو وهتنسو و كلو هيبقي تمام بس مامتك و باباكي مش هينسولو الموقف ده مهما عدي الزمن و كمان ممكن المشكلة بينكو ممكن تكبر جدا و محدش يقدر يسيطر عليها وتنتهي بالانفصال لقدر الله
مشاكلك لازم تكون بينك انتي و جوزك وبس
وكمان الكلام مينفعش اي حاجة تروح تحكيها لمامتك واختك علشان بردو ميحصلش نفس الشئ
▪لو مثلا الزوجة  اثناء الخلاف الزوج متعصب جدا مينفعش انتي بقي تعدي تتعصبي و تزعقي و صوتك يعلي انتي كمان لا ده انتي تسكتي خالص و اي حاجة يقولها توافقي علطول و بعد ما كل الحوار يخلص اطلعي و سيبيه لوحدو و بعد شوية كده اما تخشي انو بقي هادي اعمليلو عصير او خاجة سخنة يشربها و ادخلي عليه وانتي مبتسمة و تتناقشي معاه بهدوء تام و صدقيني وقتها هتوصلو لحل وسط و هتتراضو انتو الاتنين في الاخر
▪متقاطعوش بعض
هقولك ازاي انتو خلاص لتخانقتو ومتخاصمين دلوقتي  او نفترض ان الخناقة انتهت بان انتي اللي زعلتي منو اوعي بقي اما يجي يصالحك او يقرب منك تبعديه و تبقي عنيفة لا خليكي زكية اتعاملي معاه عادي خالص و اي حاجة يطلبها اعمليها بس طبعا كل ده وانتي محسساه ان اللي هو عملو ماثر فيكي و مزعلك جدا و هو لما يلاقيكي كده هيكون عندو استعداد يجبلك نجمة من السما علشان يصالحك
وعلي فكرة الكلام ليك بردو
▪الصراحةالصراحة الصراحة
شئ مهم جدا في اي علاقة الصراحة علشان هي اللي بتتبني عليها الثقة و بعدها الاحترام و دول اساس اي علاقة من وجهة نظري ومينفعش اي حاجة فيهم تنقص ....صارحو بعض يعني مثلا انت مش عاحبك حاجة فيها قولها بس بطريقة متجرحهاش و انتي بردو .......
مثلا جربو كل فترة شهر مثلا او حاجة تعدو مع بعض و كل واحد يقول للتاني ايه الحاجات اللي  بتدايقو في التاني و ايه الحاجات اللي بيحبها و كل طرف بعد الجلسة دي يركز انو يغير الحاجات اللي بدايق شريكو منو و يركز انو يفضل يعمل الحاجات اللي بيحبها شريكو
▪خصصو وقت لنفسكو
في زحمة الخياة والبيت والاطفال طبعا بتنشغلو عن بعض او خليني واضحة انتي بتنشغلي عن جوزك اخطفيلك يوم كل فترة كده اهرجو فيه انتو الاتنين مع بعض جددو الحب بينكو و ده هيقلل الخلافات بينكو جدا و هيزود الخب بينكو
▪انت متعملش الخاجة و انت عارف ان هي هتدايقها وانتي متعمليش الخاجة ان هي هتدايقو
▪انت اوعي تقولها هو انتي بتعملي ايه ولا بتتعبي في ايه انت متعرفش كم الحاجات اللي عي بتعملها طول النهار و لو عرفت هتشيلها فوق دماغك وانتي كمان اوعي تستهوني بشغلو هو بيتعب جامد علشان يعيشك عيشة حلوة انتي و اطفالكو
ده كل اللي اقدر افيدكو بيه
وكل الكلام اللي كتبتو ده من تجربتي الشخصية ومن وجهة نظري بس صدقوني نتيجتو فعالة جدا
اهيرا احب اقولك انت وهي حبو بعض خلو علاقتكو تكون صداقة قبل ما تكون زوج وزوجة مفيش حاجة اسمها الحب بيروح بمرور الزمن احنا لو عايزين الخب يستمر هيستمر الخياة هنعيشها مرة واحده فعيشها صح واستغل اي فرصة
هو زي الطفل الصغير كل ما تديلو حب و حنان هيعتبرك العالم كلو
و هي مش محتاجة غير كلمة حلوة او كلمة شكر بعد اي مجهود  بتعملهولك حتي لو بسيط ....قدرها 
و بكدة اكون وصلت لنهاية موضوعي النهاردة متنسوش تدوسو زرار الاشتراك وتكتبو ايميلكو علشان يوصلكو كل جديد
ويسعدني جدا لو شاركتوني ارائكو في الكومنتات  و تقولولي ايع الموضوعات اللي   تحبو نتكلم فيها  
وكمان تابعوني علي الانستجرام
__menna.ahmed__
والسلام عليكم 🖐🖐❤

انصحكو بقراءة
الصعوبات االي بتواجهك وانت بتحقق هدفك عديها وكمل